Segurtasuna bidean

Alertcops Guardia Zibilaren eta Polizia Nazionalaren doako aplikazioa da, eta horren bitartez edozein alerta edo larrialdi jakinarazten ahalko duzu zure gailu mugikorraren bidez denbora errealean; zure kokapena automatikoki polizien zentro operatiboetara bidaltzen da eta arreta azkar jasoko duzu.
 Aplikazioa eskuragarri dago bai Google Play-n bai App Store-n.

Honako kasu hauetan erabili beharko zenuke aplikazioa: delitu-egintza batzuk jakinaraztea, segurtasun-indar eta -kidegoei alerta baten berri ematea eta herritarrendako interesgarriak diren abisuak jasotzea. Halaber, funtzio pertsonalago bat ere badu: zure kokapena zeureekin edo salbamenduko zerbitzuekin partekatzea. Larrialdi bat gertatuz gero, azkarrago eta zehatzago aurkituko zaituzte.

Ikusi hemen Alertcops aplikazioaren funtzioak Donejakue bidean.

1. Eskura eraman zure NANa edo pasaportea erromesaldi osoan zehar.

2. Zaindu itzazu zure ondasun pertsonalak, gailu elektronikoak, agiriak, dirua eta balio bereziko objektuak, eta ez itzazu erakutsi beharrezkoa ez bada. Diruari dagokionez, ez eraman eskudiru kopuru handirik eta banatu ezazu ekipamenduaren eta erabili ohi duzun arroparen artean.

3. Besteekin batera ibili, eta ahal bada, eguzki-orduetan, batez ere neguko hilabeteetan.

4. Ez zaitez arrotzez fidatu. Bidean lagunak egin badituzu ere, ez zaitez edozeinez fidatu, ez utzi zure ekipajea ezezagunen eskuetan, eta ez utzi inork zu jende gutxi igarotzen den bidezidorretatik eramatea.

5. Bidaia aldez aurretik planifikatu; dena azken orduan hartzen baduzu, engainatua izateko arrisku handiago izanen duzu, ostatuari, erreserbei, baimenei, distantziei, zailtasunari, atseden hartzeko lekuei, hornidurari eta interesguneei dagokienez.

6. Seinaleei jarraitu. Ez zaitez ibili beste bidezidor eta bidexketatik, ezta urrutikoetatik eta seinaleztatu gabeetatik ere. Zure segurtasunerako, oso garrantzitsua da besteek zu ikustea, beraz, komenigarria da islatzaileak eta/edo jantzi deigarriak erabiltzea.

7. Lokalizatuta egon zaitez. Maite dituzun pertsonek zu non zauden jakitea lagungarria izanen da ustekabeko edozein larrialdi edo egoeraren aurrean; geolokalizazioa aktibatu eta zure mugikorra bateriarekin eduki. Horretarako, Alertcopsen ‘Función Guardian’ gomendatzen dizugu, zeinak zure lokalizazioa ere poliziari bidaltzen baitio larrialdirik izanez gero.

8. Zure etxea babestu. Donejakue bidea bezalako abentura bati ekiten diozunean, normalean zure etxea aldi baterako uzten duzu; inor ez bada bertan bizitzen geratzen, abisatu maite dituzun pertsonei noizean behin pasa daitezela dena ondo dagoela egiaztatzera eta ez argitaratu sare sozial irekietan bidaian zaudela.